Apolinar manulong na sa Korea karon

CEBU, Philippines — Ang pambato sa Omega Gym nga si Pete "Thunder" Apolinar gikatakda nga mobiyahe na sa South Korea karong adlawa aron atubangon ang laing malisud nga hagit sa sumusulbong niyang karera.

Si Apolinar, nga kuyogan ni Omega Sports Promotions Vice President Jerome Calatrava ug head trainer Julius Erving Junco, makigsangka batok sa way pildeng Korean defending champion nga si Jong Seon Kang alang sa WBO Oriental featherweight title karong Sabado, Nobiembre 6, didto sa Daejeon.

Gawas nga idugang ang WBO Oriental nga korona sa OPBF Silver featherweight belt nga anaa karon sa iyang hawak, si Apolinar naglaraw sab nga makapanimalos ni Kang, nga mibuntog sa stablemate niyang si Tomjune Mangubat pinaagi sa split decision aron birahon ang WBO regional title niadtong Nobiyembre 3, 2019 didto sa District 7 Arena in Ho Chi Minh City, Vietnam.

Ang pag-away sa teritoryo sa iyang kontra usa ka makuyaw nga misyon alang sa 26 anyos nga si Apolinar apan si Junco masaligon nga determinado kaayo ang iyang boksidor nga makalingkawas ning dakong pagsulay nga nag-atang kaniya sa unahan.

"We have completed four months of training camp and Pete is ready," matud pa ni Junco. "As his trainer, ako ikapasalig nga mohatag gyud ni og nindot nga away si Pete kay I know he is on another level."

"We will get this victory even if naay homecourt advantage amo kontra," dugang pa ni Junco.

Si Apolinar, nga lumad gikan sa San Pablo, Laguna, naglukdo og 15-1 win-loss record uban ang 9KOs samtang ang 20-anyos nga si Kang wa pay tatsa sud sa 15 ka away uban ang duha ka tabla ug unom ka daog pinaagi sa knockout.