Filipino heritage night: Jazz ni Clarkson gilubong ang Rockets ni Green

CEBU, Philippines — Yanong gilampaso ni Fil-Am Jordan Clarkson ug Utah Jazz ang kababayan niining si Jalen Green ug ang Houston Rockets, 122-91, sa makasaysayanong Filipino Heritage Night sa NBA kagahapon didto sa Toyota Center sa Houston, Texas.

Ang Rockets maoy mi-host Jazz sa maong duwa diin ang duha ka NBA players nga dunay dugo nga Pinoy nag-abot sud sa korte sa labing unang higayon.

Kulatado hinoon kaayo ang Rockets ni Green sa nagmangtas nga Jazz ni Clarkson, ang Sixth Man of the Year sa miaging NBA season.

Sa unang kuwarter pa lang daan, mibulhot na ngadto sa 32-18 nga labaw ang Jazz, nga dominante kaayo ug sa usa ka higayon mi-abante og 36 puntos.

Si Clarkson, nga nakaduwa uban sa Gilas Pilipinas sa FIBA Asia Cup niadtong 2018, mi-iskor og otso sa iyang 16 puntos alang sa Jazz, nga nagpabiling way pilde sud sa upat ka duwa.

Lain pang unom ka players ang mikadlit og double-figures sa Jazz ubos sa pagpangu ni Bojan Bogdanovic nga dunay 19 puntos. Sa iyang bahin, si Green mihipos og 13 puntos apan tulo lamang ang napasud sa 16 niini ka itsa.

Si Christian Wood maoy nangu sa pilderong Rockets uban ang 16 puntos, pito ka reboumds, ug duha ka steals.

Sa laing aksiyon, si Julius Randle mipupo og 13 puntos, 16 ka rebounds, ug siyam ka assists sa dihang gipatilaw sa New York Knicks ang Chicago Bulls sa una niining pilde pinaagi sa makapaisag balahibo nga desisyon, 104-103.

Sa ubang mga resulta, ang Washington Wizards mi-inat sa ilang baraha ngadto sa 4-1 human gibalian og pako ang Atlanta Hawks, 122-111, ang Philadelphia 76ers mipakaging sa Detroit Pistons, 110-102, samtang ang Dallas Mavericks mibuntog sa San Antonio Spurs, 104-99.