Paris Olympics sunod na puntirya ni Yulo
MANILA, Philippines — Lalo pang magpupursige si national gymnast Carlos Yulo na muling makapaglaro sa Olympic Games sa 2024 sa Paris, France.
Ito ay dahil sa kanyang pag-angkin sa gold medal sa men’s vault at silver medal sa parallel bars sa katatapos lamang na 50th FIG Artistic Gymnastics World Championships sa Kitakyushu, Japan.
“I won the gold and it was another achievement for me in the parallel bars, but there’s always something more… I want to reach my full potential as a gymnast,” sabi ng 21-anyos na si Yulo.
Kumolekta si Yulo ng total score na 14.916 mula sa kanyang 14.000 sa first vault at 15.033 sa second vault para angkinin ang gintong medalya laban sa pito pang partisipante.
Minalas naman siyang makamit ang ikalawa niyang gold medal sa torneo nang makuntento sa silver sa parallel bars sa average score na 15.300 mula sa 8.900 sa execution at 6.400 sa difficulty.
“I feel extremely happy right now. I really did my best. All the hard work has paid off. But still I’m not satisfied,” ani Yulo, humakot ng dalawang gold medal sa floor exercise at all-around events at limang silver sa vault, parallel bars, pommel horse, horizontal bar at rings noong 2019 Southeast Asian Games.
Hindi rin niya naidepensa ang korona sa floor exercise nang tumapos sa fifth place sa nasabing world championships sa Kitakyushu.
Malalaking kompetisyon pa ang sasalihan ni Yulo sa susunod na taon kagaya ng Southeast Asian Games sa Hanoi, Vietnam sa Mayo at Asian Games sa Hangzhou, China sa Setyembre.
Samantala, tatalakayin ng Philippine Sports Commission (PSC) Board kung magkano ang ibibigay na cash incentives kay Yulo.
Nakasaad sa Republic Act 10699 o ang National Athletes and Coaches Benefits and Incentives Act na ang makukuhang gold at silver medal ng isang atleta sa world championship ay may katapat na P1 milyon at P500,000, ayon sa pagkakasunod.
Ngunit ito ay ibibigay lamang para sa mga world-level competition na ginagawa tuwing ikalawang taon at may kalahok na humigit-kumulang sa 45 bansa.
Nang makamit ang gold medal sa floor exercise noong 2019 edition sa Stuttgart, Germany ay binigyan si Yulo ng PSC ng kabuuang P1 milyong insentibo – ang P500,000 ay para sa kanyang panalo at P500,000 sa pag-qualify sa 2021 Tokyo Olympics.
- Latest
