Valdez pinaiyak ni Big Brother
MANILA, Philippines — Naging emosyonal si Alyssa Valdez sa isang episode ng Pinoy Big Brother: Kumunity Season 10.
Alam ng lahat na matapang si Valdez sa loob ng court lalo na sa tuwing may laban ito kasama ang Creamline Cool Smashers o ang kanyang dating koponan na Ateneo de Manila University sa UAAP.
Subalit hindi napigilan ni Valdez na maging emosyonal matapos makatanggap ng sulat mula sa kanyang mga mahal sa buhay.
“Dear Aly, anak Ly alam kong hindi madali ang pinasok mo ngayon. Hindi rin namin alam kung ok ka ba sa Bahay ni Kuya. Pero alam naming kayang kaya mo yan,” ani Valdez na pinipigilang mapaiyak habang binabasa ang sulat.
Galing ito sa kanyang ina na pangunahing tagasuporta ng volleyball player.
Nangako ang pamilya nito na mananatiling nakaalalay sa lahat ng magiging desisyon ni Alyssa sa buhay.
Nagpadala rin ang nanay nito ng larawan ng kanilang bahay na resulta ng pagsisikap ni Valdez sa mundo ng volleyball.
“Nandito lang kami nina tatay, kuya at Ian para laging sumuporta sayo. Ipinadala ko sayo ang larawang ito na sumisimbolo sa iyong katatagan at kababaan ng iyon kalooban, kadakilaan ng iyong puso at pagmamahal,” pagpapatuloy pa ni Valdez.
Hindi na napigilan pa ni Valdez na maluha habang binabasa nito ang maramdaming mensahe ng kanyang magulang.
Nagpasalamat ang pamilya nito sa lahat ng tulong at suportang ibinigay ni Valdez upang maging maginhawa ang kanilang buhay mula sa pagiging simple noon hanggang sa magkaroon ng magarbong tahanan.
Isa ang Cool Smashers team captain sa 12 housemates na kasalukuyang nasa Bahay ni Kuya.
- Latest