Irving midepensa sa kaugalingon

CEBU, Philippines — Si NBA star Kyrie Irving sa Brooklyn Nets midepensa sa iyang kaugalingon kabahin sa isyu sa pagpabakuna batok sa Covid-19 nga nagsentro kaniya.

Matud pa ni Irving nga iya lamang gibuhat kon unsay labing maayo alang kaniya sa iyang pagbalibad nga mabakunahan siya batok sa gikahadlokang virus nga hangtud karong padayong nanghasi sa tibuok kalibutan.

Tungod niini, ang management sa Nets nakahukom nga dili paduwaon si Irving uban kanila sa umabot nga 2021-22 NBA season nga magsugod na sunod semana.

Sa iyang bahin, si Irving nanghinaut nga makataak siya og balik sa korte kauban ang iyang mga teammates apan dili mahitabo nga moyukbo siya sa presyur nga siya mabakunahan.

Giklaro hinoon ni Irving nga wala siya'y habig nga gidapigan sa mga pro o anti-vaccine. Nasayud siya sa iyang madangatan tungod sa iyang aksiyon apan gusto niya nga duna siya'y kagawasan sa mga butang iyang pagabuhaton.

"Do what's best for you, but I am not an advocate for either side. I am doing what's best for me," pasabot pa ni Irving."It's not any one thing. It's just about the freedom of what I want to do."

Mihatag sab og katin-awan si Irving nga dili pa siya moretiro ug dili mahitabo nga mobiya siya sa basketball sa susama niining nga sitwasyon.

"No, I'm not retiring, and no, I'm not going and leaving this game like this. There's still so much more work to do," dason pa ni Irving.