SK Poblacion Oriental 'Fun Ride' kasado na
CEBU, Philippines — Ang Sangguniang Kabataan (SK) sa Barangay Poblacion Oriental, lungsod sa Consolacion mopasiugda og usa ka 'Fun Ride' sugod sa alas-9 sa buntag karong Domingo, Oktubre 17.
Gi-organisa sa Youth United Bikers' Association sa Poblacion Oriental, ang maong kalihukan eksklusibo lamang sa mga seklista nga residente sa barangay, sigun pa ni SK chairman Carlos Donn Flores sa iyang Facebook page.
"We want the residents of our barangay to further engage themselves in exercise through sports despite the challenges brought by this pandemic," matud pa ni Flores, nga mao sab ang presidente sa SK Federation sa Consolacion ubos sa liderato ni mayor Joannes "Joyjoy" P. Alegado.
Bisan og kalingawan lamang ang tuyo, dunay ganting salapi nga i-apud-apud ngadto sa labing paspas nga mga partisipante.
Ang unang makaabot sa finish line mobulsa og P3,000 samtang ang mopahiluna sa ikaduha ug ikatulong dapit makadawat og P2,000 ug P1,000 nga pahalipay.
Gipaniguro ni Flores nga ang tanang patakaran sa panglawas ug kaluwasan istrikto nilang pagasundon atol sa pagpahigayon sa umaabot nilang aktibidad nga kabahin sa kasaulogan sa pista sa Consolacion agig pagtamod sa minahal nilang patron nga si San Narciso karong Oktubre 29.
- Latest
