Quarters target ni Fernandez sa Indian Wells

MANILA, Philippines — Patuloy ang mainit na ratsada ni Filipino-Canadian Leylah Fernandez nang umabante ito sa third round ng prestihiyosong BNP Paribas Open na ginaganap sa Indian Wells, California.

Ginulantang ni Fernandez si ninth seed Anastasia Pavlyuchenkova ng Russia sa kanilang second round match sa bisa ng  5-7, 6-3, 6-4 come-from-behind win.

Matapos ang mabagal na si­mula, rumesbak si Fernandez sa mga sumunod na sets para matamis na patumbahin ang seeded rival sa labang tumagal ng mahigit dalawang oras.

Nakuha ni Fernandez ang 5-3 bentahe sa third set.

Sinubukang apulahin ng Russian ang mainit na kamada ni Fernandez nang makadikit ito sa 4-5.

Subalit iyon na lamang ang naka­yanan ng Russian matapos magpakawala ng matatalim na serves si Fernandez para tuluyang makuha ang panalo.

Target ni Fernandez na masikwat ang quarterfinals slot sa pagharap nito kay American Shelby Rogers.

Pasok din sa quarterfinals si Fernandez sa doubles event.

Kapares ni Fernandez si American netter Coco Gauff kung saan mabilis na pinataob ng dalawa sina fifth seeds Nicole Melichar-Martinez ng Amerika at Demi Schuurs ng Netherlands, 6-3, 6-2, sa loob lamang ng 62 minuto.

Makakaharap ni Fernandez at Gauff ang magwawagi kina second-seeded Elise Mertens at Su-Wei Hsieh at kina Iga Swiatek at Bethanie Mattek-Sands.