Irving dili makaduwa sa Nets
CEBU, Philippines — Dili makaduwa si Kyrie Irving uban sa Brooklyn Nets sa ilang NBA pre-season game batok sa defending champion Milwaukee Bucks karon untang adlawa.
Usa kini ka lig-ong indikasyon nga hangtud karon si Irving wala pa gihapon makatuman sa rekisito sa New York kabahin sa pagpabakuna.
Si Irving wala pa sab maka-apil bisan kausa sa mga praktis sa Nets didto sa New York, diin ang mga propesyonal athletes gi-obliga nga magpakuna batok sa Covid-19 aron sila tugotan nga maka-praktis o makaduwa sa ilang teams.
Hangtud karon si Irving nagdumili sa pagpabakuna batok sa gikahadlokang virus nga hangtud karon padayong nanghasi sa tibuok kalibutan.
Kon dili mausab ang huna-huna ni Irving, hayan nga dili siya makaduwa sa 41 ka mga home games sa Nets sa umaabot nga 2021-22 NBA season nga magsugod ning tapos buwan.
Kon kini mahitabo, dako-dako nga kantidad ang makuha gikan sa suweldo ni Irving kay dili man siya bayran sa mga duwa nga siya makapalta.
- Latest
