HD Spikers nagdagdag ng 3 key players
MANILA, Philippines — Nagdagdag ng tatlong importanteng players ang Cignal HD Spikers upang mapalakas ang lineup nito sa susunod na kumperensiya ng Premier Volleyball League (PVL).
Kinuha ng HD Spikers sina opposite hitter/middle blocker Angeli Araneta, playmaker Angel Cayuna at libero Bia General na galing sa magkakaibang koponan.
Naglaro si Cayuna para sa Perlas Spikers sa Open Conference ng liga sa Bacarra, Ilocos Norte habang huling nasilayan sina Araneta at General sa Philippine Superliga suot ang Generika-Ayala jersey.
Mainit na tinanggap ng HD Spikers ang tatlong players sa kanilang koponan.
“She’s ready to set a new standard. Awesomenation, let’s give a warm welcome to our newest team member Angel Cayuna,” ayon sa post ng Cignal HD sa kanilang social media.
Malaking dagdag si Araneta sa opensa lalo pa’t malalim ang karanasan nito para makatuwang nina team captain Rachel Anne Daquis, Janine Marciano, May Luna, Fiola Ceballos, Janine Marciano at Roselyn Doria.
Makakapares naman ni General sa floor defense si seasoned libero Jheck Dionela habang magiging kapalitan ni playmaker Ayel Estranero si Cayuna sa setting department.
Puntirya ng HD Spikers na malampasan ang masaklap na kampanya nito sa Open Conference kung saan nagtala lamang ang tropa ng isang panalo sa siyam na laro.
- Latest
