Casimero iba rin ang makakalaban
MANILA, Philippines — Tuluyan nang nagsara ang posible sanang paghaharap nina WBC bantamweight champion Nonito “The Filipino Flash” Donaire at WBO bantamweight king John Riel Casimero.
Ito ay matapos ipag-utos ng WBO na harapin ni Casimero si mandatory challenger Paul Butler sa kanyang title defense.
Ipinaalam na ng WBO ang desisyon nito sa kampo nina Casimero at Butler.
“The WBO World Championship Committee hereby orders the parties herein commencement of negotiations for the above-mentioned WBO Bantamweight Mandatory Championship Contest,” ayon sa sulat ni WBO championship committee Luis Batista-Salas.
Kaya naman inaasahang agad na sisimulan ang negosasyon upang maikasa na ang laban.
Binigyan ng 20 araw sina Casimero at Butler para maisaayos ang laban.
Kung hindi mapaplantsa ng dalawang kampo ang Casimero-Butler fight, daraan ito sa Purse Bid para desisyunan ang laban.
“If an accord is not reached within the time frame set forth herein, a Purse Bid will be ordered pursuant to WBO Regulations of World Championship Contests,” saad pa sa sulat ng WBO.
Nauna nang ipinag-utos ng WBC na makalaban ni Donaire si mandatory challenger Reymart Gaballo sa kanyang title defense.
Matapos ang maiinit na bangayan sa social media, nagkaayos na sina Donaire at Casimero sa pag-asang maikasa ang unification bout.
Subalit hindi na ito matutuloy lalo pa’t ang WBO at WBC na ang nag-utos sa kanilang title defense.
- Latest
