Beermen No. 4 seed, gitagak ang Aces

CEBU, Philippines — Naka-igo ang San Miguel Beer og duha ka langgam gamit ang usa lamang ka batok human sa kulbahinam niining 101-100 nga kadaogan batok sa Alaska Aces sa 46th PBA Philippine Cup didto sa DHVSU gym sa Bacolor, Pampanga. Gawas nga gisilyohan ang ilang puwesto isip No.4 seed sa quarterfinals bitbit ang 7-4 win-loss record, gipabakwit sab sa Beermen ang Aces nga nasugamak sa ikapito niining pilde sud sa 10 ka duwa.

Ang Alaska nanamilit na sa torneyo bisan unsa pa ang resulta sa ilang sangka batok sa NorthPort Batang Pier nga giduwa pa samtang sa pagsulat ning balita kagahapon. Nahimong bayani Beermen mao si Marcio Lassiter nga miposa sa kruyal niyang tres sa hilimatyong segundos nga nahibilin nga nakapakulob sa Aces sa hingpit.

Gumikan niini, ang Beermen m0-asdang sa playoffs isip No.4 seed sunod sa No. 1 TNT Tropang Giga, No. 2 Meralco Bolts ug No. 3 Magnolia Hotshot.

"Alam namin all-out sila for their quarterfinals drive. As for us, we wanted that W because gusto namin pumasok sa quarters na may momentum," matud pa ni San Miguel coach Leo Austria.

Si CJ Perez maoy nangu sa Beermen uban ang 20 puntos, unom ka rebounds, upat ka steals, tulo ka assists ug usa ka block.

Nagparamdam sab ang Sugbuanong higante nga si June Mar Fajardo nga mikimada og 17 puntos ug 10 ka rebounds alang sa Beermen.Si Chris Ross duna say 17 puntos samtang si Lassiter moamot og 13 puntos.