6 boxers posibleng sumabak sa 2024 Paris Olympics

MANILA, Philippines — Posibleng anim na atleta ang mailahok ng Association of Boxing Alliances in the Philippines (ABAP) sa 2024 Olympic Games sa Paris, France.

Ayon kay national boxing coach Elmer Pamisa, marami pang miyembro ng national team na may tsansang makasali sa nasabing quadrennial event matapos ang matagumpay na kampanya sa Tokyo, Japan noong Hulyo.

Ilan sa mga ito ay sina Eljay Pamisa, Jericho Acaylar, Mark Christian Laurence at Marvin Tabamo.

“Sa tingin ko itong sa Paris (Olympics) siguradong maraming makakapasok,” wika ni Pamisa sa Philippine Sports Commission (PSC) Hour.

Sa nakaraang Tokyo Olympics ay sumuntok sina featherweight Nesthy Petecio at flyweight Carlo Paalam ng silver medal habang may bronze si middleweight Eumir Felix Marcial.

Kumpiyansa si Pamisa na may iba pang tubong Cagayan de Oro na makakalaro sa 2024 Paris Olympics bukod kay Paalam.

“Sa tingin ko itong sa Paris (Olympics) sigurado maraming makakapasok galing dito sa Cagayan dahil nakikita ko iyong training nila at tsaka iba rin ang laro nila. Nakikita ko ang determinasyon nila at may will to win sila,” ani Pamisa.

Samantala, pinaghahandaan ng ABAP ang isang dual tournament sa Thailand.

Nasa Cagayan de Oro na si national coach Ronald Chavez at Elias Recaido at Australian consultant Don Abnett para maghanap ng mga batang boksingero na isasabak sa juniors at youth division ng nasabing dual meet.

Nakatakdang magtungo sina Chavez, Recaido at Abnett sa Cebu para kumuha ng tig-tatlong juniors at youth boxers na ipapasok sa bubble training sa Cagayan de Oro.