Pacquiao No. 5 sa Ring Magazine rating

MANILA, Philippines — Sa kabila ng kabiguan kay reigning World Boxing Association (WBA) titlist Yordenis Ugas, hindi pa rin mawawala ang ningning sa pangalan ni People’s Champion Manny Pacquiao.

Hawak ni Pacquiao ang ikalimang puwesto sa kanyang dibisyon sa listahan ng Ring Magazine.

Nasa unang posisyon si World Boxing Council (WBC) at International Boxing Federation (IBF) welterweight champion Errol Spence Jr. sa kabila ng kabiguang nitong makalaban kontra kay Pacquiao dahil sa kanyang eye injury.

Sumesegunda si World Boxing Organization (WBO) champ Terrence Crawford habang ikatlo naman si Ugas at ikaapat si Shawn Porter.

Sariwa pa si Pacquiao sa unanimous decision loss kay Ugas noong Agosto 21 (Agosto 22 sa Maynila) sa Las Vegas, Nevada.

Subalit hindi ito lubos na nakaapekto sa puwesto ni Pacquiao kaya’t malinaw na isa pa rin ang Pinoy champion sa pinakamatikas na boksingero sa kanyang dibisyon.

Target sanang ikasa ang rematch sa pagitan nina Pacquiao at Ugas.

Ngunit posibleng hindi ito matuloy matapos lumutang ang bali-balitang unification bout nina Ugas at Spence.

Nangunguna naman ang pangalan ni WBC champion Nonito “The Filipino Flash” Donaire sa bantamweight division kabuntot sa ikalawa si WBO champion John Riel Casimero.

Sa super flyweight division, nasa No. 5 si IBF champion Jerwin Ancajas at ikapito naman si dating world champion Donnie Nietes.