160 atleta isasabak ng Pinas sa 2022 AIMAG meet
MANILA, Philippines — Kabuuang 160 atleta ang isasabak ng Pilipinas sa 21 sa nakalatag na 31 sports sa 6th Asian Indoor and Martial Arts Games na nakatakda sa Marso 10-20, 2022 sa Bangkok at Chonburi sa Thailand.
“We have put together a delegation whose members are all potential for the medals,” ani kahapon ni Philippine Olympic Committee (POC) president Abraham “Bambol” Tolentino.
Nauna nang itinakda ang AIMAG noong Mayo 21-30, ngunit inilipat ng petsa dahil sa coronavirus disease (COVID-19) pandemic.
Ang 21 sports na lalahukan ng Team Philippines ay ang aquatics, 3x3 basketball, billiards, bowling, chess, dancesport, e-sports, indoor athletics, indoor rowing, jiu-jitsu, karate, kickboxing, kurash, muay, pencak silat, sambo, sepak takraw, shooting, skateboarding, taekwondo at wrestling.
Sa huling edisyon ng AIMAG noong 2017 na idinaos sa Ashgabat, Turkmenistan ay kumolekta ang delegasyon ng dalawang gold medals mula kina jiu-jitsu artists Margarita Ochoa (women Ne-waza – 45 kgs) at Annie Ramirez (women Ne-waza -55 kgs).
Bukod sa dalawang ginto ay sumikwat din ang Team Philippines, nagsabak ng 105 atleta sa 17 sa kabuuang 21 sports, ng 14 pilak at 14 tansong medalya.
Kasama si Tokyo Olympics gold medalist Hidilyn Diaz sa nasabing delegasyon at bumuhat ng silver medal sa women’s weightlifting.
- Latest
