RCM Don Phoenix naghari sa Toledo 3on3 chessfest
CEBU, Philippines — Ang Don Phoenix sa RiChessMasters (RCM) maoy nakampiyon sa Stay at Home Checkmate Covid-19 3on3 Online Chess Team Battle nga gipasiugdahan sa Toledo City Chess Club inabagan sa Toledo Trojans ning bag-ohay pa lamang. Gipangulohan nilang International Master Joel Pimentel, Dione Minoza ug Bhell Ortiz, ang RCM Don Phoenix nanghawod sa torneyo nga gipaluyohan sa Jaz Aggregates ug SpicyTing Products uban ang iskor nga 149 puntos.
Ang Cronica, ubos sa pagtimon ni Grandmaster Rogelio “Joey” Antonio Jr., Ariel Santander, ug Mikhail Laoagan, mipahiluna sa ikaduhang dapit bitbit ang 141 punto, samtang ang RRK Chess Warriors nilang Kevin Arquero, Rafael Sim, ug Ruel Jayan mitapos ikatulo uban ang 137 puntos.
Ang MJR Team 2 nilang Jan Clifford Labog, Mark Kevin Labog, ug Randy John Pablo ug ang Pawnpocalypse nilang Vince Duane Pascual, Joey Albert Florendo, ug Rhenz Rheann Auza mikadlit og 122 ug 118 puntos aron pag-okupar sa ikaupat ug ikalimang puwesto.
Nalandig sa ikaunom nga dapit mao ang Team Atabs nilang Joseph Lawrence Rivera, Mark Gerald Reyes, ug Chester Neil Reyes uban ang 115 puntos ug gisundan kini sa Tondo Warriors nilang Jonathan Docot, Felix Aguilera, ug Patrick Ismael Credo nga dunay 110 puntos. Ang Atabs mao say gibayaw nga labing maayong Under 18 team.
Nagkumpleto sa top 10 mao ang Mindanao Chesskings nilang Arena GM Henry Roger Lopez, Rogelio Canoy, ug Christian Gian Karlo Arca uban ang 108 puntos, Negros Kingsmen 1 nilang Adrian dela Cruz, Theseus Benitez, ug Genesis Borromeo uban ang 106 puntos, ug BabinGC8 nilang Roumundo Edades, Basilio Pandan, ug Robert Mania uban ang 104 puntos.
Sa laing bahin, ang mga board medalists mao sila si GM Rogelio Antonio Jr. sa Cronica, Mark Kevin Labog sa MJR Team 2, ug Chester Neil Reyes sa Team Atabs.
- Latest
