Ika-2 pro fight ni Marcial ikinakasa na
MANILA, Philippines — Inaasahan ng MP Promotions na sa susunod na buwan ay babalik si Olympic Games bronze medalist Eumir Felix Marcial sa Wild Card Boxing Gym para ipagpatuloy ang kanyang ensayo.
Ito, ayon kay MP Promotions president Sean Gibbons, ay dahil sa itatakdang ikalawang professional fight ng middleweight na si Marcial.
“We’re hoping by the beginning of September, to have him over here,” sabi ni Gibbons sa tubong Zamboanga City fighter. “Absolutely, he’s going to be in the ring, somewhere, having another pro fight by the end of the year. That’s a gimme, for sure.”
Pinapirma ng MP Promotions ni world eight-division champion Sen. Manny Pacquiao si Marcial sa isang six-year contract noong Hulyo ng nakaraang taon.
Ginawa ni Marcial, sinanay ni Hall of Fame trainer Freddie Roach, ang kanyang pro debut noong Disyembre kung saan niya tinalo si American Andrew Whitfield via unanimous decision.
Sa nakaraang Olympics sa Tokyo Japan ay ilang pro fighters din ang nakasagupa ni Marcial, ang pinakamalupit ay si Oleksandr Khyzhniak ng Ukraine na sumibak sa kanya sa semifinals.
Target ng 2019 Southeast Asian Games gold medalist na muling makalaro sa 2024 Olympics sa Paris, France para sa tsansa sa gold medal.
- Latest