Marcial may dalawang misyon

MANILA, Philippines — Dalawa ang tatargetin ni Tokyo Olympics bronze medalist Eumir Felix Marcial sa kanyang susunod na pagsalang sa boksing.

Ito ay ang makuha ang gintong medalya sa 2024 Paris Olympics at maging world champion sa middleweight division.

Ayon kay Marcial, hindi madali ang daang tatahakin nito. Subait handa ang Pinoy pug na magsakripisyo at gawin ang lahat upang makamit ang tagumpay na ito.

“Kailangan pa na pagbutihin sa training namin para maabot yung mga pangarap namin. Nasa puso na namin na gusto talaga naming makuha ang gold medal,” ani Marcial.

Nais nitong gawing ins­pirasyon ang naging karanasan ni Tokyo Olympics gold medalist Hidilyn Diaz na dumaan sa matinding pagsubok bago maabot ang inaasam na gintong medalya.

Apat na Olympic Games ang pinagdaanan ni Diaz bago makuha ang ginto — una noong 2008 sa Beijing, China kasunod ang 2012 London Olympics bago masiguro ang pilak sa 2016 Rio Olympics at ang ginto sa Tokyo Games.

Maliban sa Olympic gold, hangad din ni Marcial na makuha ang world title sa professional boxing.

Matapos ang Tokyo Olympics, nakaabang na ang professional boxing career nito kasama ang MP Promotions.