Petecio flag bearer sa closing ceremony

MANILA, Philippines — Isa pang national boxer ang muling magiging flag bearer ng Team Philippines sa Tokyo Olympic Games.

Pinili ng Philippine Olympic Committee (POC) si Olympic silver meda­list Nesthy Petecio para magdala ng Philippine flag sa closing ceremonies ng quadrennial event ngayong hapon sa Tokyo Olympic Stadium.

“Ang flag bearer natin si Nesthy,” sabi kahapon ni Team Philippines Chef De Mission Mariano ‘Nonong’ Araneta. “And of course, iyong mga officials, ‘yung mga boxing officials at kung sino pa ang atleta doon.”

Inangkin ni Petecio ang silver medal matapos ma­bigo sa finals ng women’s featherweight division ng Tokyo Olympics boxing competition.

Sumuntok din si flyweight Carlo Paalam ng silver medal nang matalo kay Galal Yafai ng Great Britain.

Naging tampok sa kampanya ng delegasyon sa T­okyo Games ang pagbuhat ni weightlifter Hidilyn Diaz sa kauna-unahang Olympic gold ng Pinas sa women’s 55-kilogram division.

Bukod kina Petecio at Paalam, inaasahang dadalo rin sa closing rites ng Tokyo Olympics sina bronze medalist Eumir Felix Marcial (middleweight) at Irish Magno (flyweight) at golfers Yuka Saso at Bianca Pagdanganan.

“Iyong mga officials bibigyan din natin ng pagkakataon na mag-march kasi noong opening, limited lang,” sabi ni Araneta. “We are now given 10 additional passes for the officials.”

Si Marcial ang naging flag bearer ng Team Philippines sa opening ceremony kasama si Fil-Japanese judoka Kiyomi Watanabe.