Didal duna diay angol

CEBU, Philippines — Ang Sugbuanong skateboard sensation nga si Margielyn Didal nagpunay og tingsi samtang mipakita’g aksiyon sa women’s street event sa 2020 Tokyo Olympics skateboarding competition dili pa lamang dugay.

Apan ang wala mahibaw-i sa kadaghanan, si Didal duna diay gihambin nga angol sa tuo niyang kiting sa wala pa miasdang sa labing una niyang salida sa prestihoyosong torneyo nga mahitabo kausa lamang sud sa upat ka tuig.

“I got injured nung last day ng training namin while in LA,” butyag pa ni Didal.

“While in prelims, nakatape lang yung both ankles ko so I can still skate,” dugang pa sa 21-anyos nga garbo sa Barangay Lahug, Cebu City.  Bisan pa man niini, si Didal mipakita gihapon og maayong pasundayag dayon na ngadto sa pagtapos sa ikawalong dapit sud sa 10 ka mga finalists.    

Human sa iyang kampanya sa Olympics, si Didal buot moapil sa Street League Skateboarding didto sa Salt Lake City, Utah karong Agosto 27-28.

Apan sa pagka karon, bugtong gihuna-huna ni Didal mao nga makapauli na sa Cebu kay gimingaw na kaayo siya sa iyang pamilya.