Petecio Nanuktok sa gold
CEBU, Philippines — Segurado nang maka-silver; Paalam abante sa quarters
Segurado nang makabulsa og silver medal ang Pinay'ng boksidor nga si Nesthy Petecio.
Kini human gipukan ni Petecio si Irma Testa sa Italy pinaagi sa split decision, 4-1, aron pagtikang sa women's featherweight finals sa 2020 Tokyo Olympics boxing event kagahapon didto sa Kokugikan Arena sa Japan.
Pilde unta si Petecio sa unang hugna apan madasigon siyang namawi sa sunod nga duha ka hugna aron piogon ang lig-on sab nga Italyano.
Sunod nga misyon ni Petecio mao ang paglangkat sa labing unang gold sa Pilipinas sa Olympics boxing.
Iyang makab-ot ang maong kasaysayan kon ugaling iyang pildihon ang modaog sa engkuwentro tali nilang Kariss Artingstall sa United Kingdom ug Sena Irie sa Japan sa finals karong Martes, Agosto 3, ssa alas 12:05 sa hapon.
Sa laing bahin, ang kababayan ni Petecio nga si Carlo Paalam padayon sab nga miratsada human gibuntog si Mohamed Flissi sa Alregia pinaagi sa unanimous decision, 5-0, aron pagtaak sa men's flyweight quarterfinals.
Usa na lang ka daog ang gikinahanglan ni Paalam aron pagseguro sa nasud og bronseng medalya. Ning higayona, tulo na lang ka daog ang iyang gintang gikan sa bililhong bulawan.
- Latest
