Hidilyn Diaz taas og pagsalig ni Ando

CEBU, Philippines — Gipanglantawan sa bayaning weightlifter sa Pilipinas nga si Hidilyn Diaz ang usa ka mahayag nga ugma alang sa Sugbuanon niyang kababayan nga si Elreen Ann Ando.

Ang 22-anyos nga si Ando mihimo og impresyon sa labing una niyang pagkumbati sa Olympics bisan tuod og mitapos lamang siya sa ikapitong dapit sa finals sa women's 64kg division sa 2020 Tokyo Olympics weightlifting tulo ka adlaw pa lamang ang milabay. Kini gumikan kay gibuak ni Ando ang iyang personal record nga usa ka dakong senyales sa mas dako pang butang nga maabot sa iyang karera.

Usa sa mga misalig nga maka-medalya si Ando sa umaabot nga mga Olympics ilabi na karong 2024 didto sa Paris, France mao si Diaz, nga dili pa lamang dugay mikulit og kasaysayan human gilangkat ang labing unang Olympic gold medal sa Pilipinas.

"Nakita ko si Ando, determinado siyang atleta at alam kong marami siyang natutunan nung Olympics," matud pa ni Diaz sa dihang nahinabi nilang Ted Failon ug DJ ChaCha sa TV5. "First experience niya at alam kong next Paris Olympics mag-qualify siya ulit," dugang pa ni Diaz.

Mismo si Diaz nanginahanglan pa og tulo ka Olympics sa wala pa migpugnit og medalya niadtong 2016 didto sa Rio de Janiero, Brazil diin iyang gibisbisan ang 20 ka tuig nga huwaw sa medalya sa nasud sa Olympics. Sa gipakita ni Ando sa una niyang salida sa prestihiyosong torneyo nga mahitabo kausa lamang sud sa upat ka tuig, si Diaz malaumon kaayo nga sanag ang ugma nga nagpaabot ni Ando, lumad gikan sa Barangay Carreta, dakbayan sa Sugbu.

"Alam kong gagawin niyang lahat para manalo para sa Pilipinas," kanayon pa ni Diaz.