Westbrook nabira sa Lakers
Moporma'g 'superteam' uban si James ug Davis
CEBU, Philippines — Uniporme na sa Los Angeles Lakers ang sul-oton ni All-Star guard Russell Westbrook sa sunod nga NBA season.
Kini human gi-trade sa Washington Wizards si Westbrook ngadto sa Lakers kagahapong adlawa sigun pa sa nagkadaiyang taho sa ESPN, USA Today ug The Athletic.
Isip hulip ni Westbrook, nakuha sa Wizards sila si Kyle Kuzma, Montrezl Harrell ug Kentavious Caldwell-Pope ug ingon man ang No.22 pick sa Lakers sa NBA Draft kagahapon ug laing duhan ka second-round picks sa umaabot.
Sa iyang pagtapon sa Lakers, si Westbrook moporma og laing 'superteam' sa NBA kauban sila si LeBron James ug Anthony Davis.
Si Westbrook, nga nagdako sa LA, mi-average og 22.2 puntos, 11.5 rebounds ug 11.7 assists sa Wizards sa miaging season.
Ang 32-anyos nga si Westbrook maoy 2017 NBA MVP sa dihang nagduwa pa siya sa Oklahoma City. Milanat siya og 11 ka tuig sa Thunder (2008-2019) sa wala pa mibalhin sa Houston Rockets diin iyang nakauban si James Harden niadtong 2019-2020 season.
Niadtong Disiembre, nagpabalhin na sab og team si Westbrook, ning higayon sa Wizards nga iyang gitabangan makasud sa playoffs.
- Latest
