Petecio naglaraw luna sa finals
CEBU, Philippines — Luna sa gold-medal round ang tuyo ni Nesthy Petecio sa dihang iyang sangkaon ang Italyanong si Irma Testa sa women's featherweight semifinals sa 2020 Tokyo Oympics boxing event karong adlawa didto sa Kokugikan Arena sa Japan.
Human mikadlit og tulo ka sagunson nga daog, ang 29-anyos nga si Petecio segurado nang makabira og bronze.
Gawas nga mihimo og kasaysayan isip labing unang Pinay'ng boksidor nga nakadaog og medalya, gisilyohan sab ni Petecio ang unang medalya sa Pilipinas sa boksing sukad si Mansueto "Onyok" Velasco naka-silver niadtong 1996 Atlanta Olympics.
Si Petecio segurado sab nga mopugnit og silver medal kon ugaling iyang mabihag si Testa human sa ilang engkuwentro karong alas 12:39 sa hapon. Sa dili pa mokatkat sa ring si Petecio, ang kababayan niyang si Carlo Paalam nanghinaut nga mo-abante sa men's flyweight quarterfinals sa pakigsangka niini batok ni Mohamed Flissi sa Algeria karong alas 10:48 sa buntag.
- Latest