Hotshots kakapit sa liderato vs Dyip
MANILA, Philippines — Hindi porke wala pang panalo ang Terrafirma sa dalawang laro ay magkukumpiyansa na ang nangungunang Magnolia.
Target ang kanilang ikaapat na sunod na panalo, lalabanan ng Hotshots ang Dyip ngayong alas-12:30 ng tanghali sa 2021 PBA Philippine Cup sa Ynares Sports Arena sa Pasig City
“Medyo mahirap, marami pang puwedeng mangyari. Hindi kami puwedeng mag-relax,” ani coach Chito Victolero matapos ang 89-79 panalo ng kanyang Magnolia (3-0) sa nagdedepensang Ginebra noong Linggo. “We have an ultimate goal. We will try to find ways on how to prepare hard and how to win.”
Nakalasap naman ang Terrafirma (0-2) ng 94-108 kabiguan sa NLEX (2-2) sa kanilang huling laro.
“This is a big team, a very physical, athletic team. Mahirap silang talunin,” sabi ni Road Warriors’ mentor Yeng Guiao sa Dyip.
Sina Paul Lee, Ian Sangalang, Calvin Abueva at Mark Barroca ang muling babandera sa Hotshots katapat sina No. 1 overall pick Joshua Munzon, Aldrech Ramos, Roosevelt Adams at Rashwan McCarthy ng Dyip.
Sa ikalawang laro sa alas-3 ng hapon ay magtutuos ang TNT (1-0) at Rain or Shine (3-1) kasunod ang bakbakan ng Ginebra (1-2) at NorthPort (1-2).
Umiskor ang Tropang Giga ng 86-79 panalo sa Dyip at nakatikim ang Elasto Painters ng 48-74 pagkatalo sa Alaska Aces (2-2).
Ito naman ang unang pagkakataon na maghaharap ang Gin Kings at Batang Pier matapos ang palitang Christian Standhardinger-Greg Slaughter.
Parehong nagmula sa kabiguan ang Ginebra sa Magnolia, 79-89, at ang NorthPort sa San Miguel, 86-88, sa kani-kanilang huling laro.
- Latest