Insentibo ni Diaz P48.5M na
CEBU, Philippines — Miburot ngadto na sa P48.5 million ang insentibo nga madawat ni weightlifter Hidilyn Diaz sa pagtunol niini sa labing unang Olympic gold medal sa Pilipinas didto sa 2020 Tokyo Olympics.
Kini human ang Philippine Sports Commission (PSC) mohatag og dugang P5 million nga pahalipay alang ni Diaz, nga mibisbis sa 97 ka tuig nga huwaw sa bulawang medalya sa nasud sa Olympics upat ka adlaw pa lamang ang milabay. Gikompirma ni PSC Commissioner Celia Kiram nga ang dugang insentibo aprubado na, napirmahan na, ug andam nang i-release.
Tungod niini, si Diaz mobulsa og P20.5 million tanan gikan sa kagamhanan. P15 million niini gikan sa PSC, P2.5 million gikan sa Zamboanga City LGU, ug P3 million gikan ni Presidente Rodrigo Duterte mismo.
Sa kinatibuk-an, si Diaz mokubra og P48.5 million apil na niini ang P10 million gikan sa Manny V. Pangilinan Sports Foundation (MVPSF), P10 million gikan ni Ramon Ang sa San Miguel Corporation, P5 million gikan ni Dennis Uy sa Phoenix Petroluem, ug P3 million gikan ni Deputy Speaker Mikee Romero.
Gawas pa kana sa dugang house and lot didto sa Zamboanga gikan ni Presidente Duterte, house and lot sa Tagaytay gikan ni POC President Abraham "Bambol" Tolentino, P14 million nga condo unit sa Eastwood gikan ni Andrew Tan sa Megaworld Corp., P4 million house and lot gikan sa Century Properties, libreng gasolina sa tibuok niyang kinabuhi gikan sa Phoenix Petroleum, ug libreng sakay sa tibuok niyang kinabuhi kortesiya sa AirAsia ug Philippine Airlines, ug usa ka van gikan sa Foton.
- Latest
