Petecio segurado nang maka-bronze

Duha ka daog na lang sa Olympics gold

CEBU, Philippines — Gigarantiyahan ni Nesthy Petecio ang Pilipinas og bronze medal human iyang gipalagpot si Arias Castaneda sa Colombia pinaagi sa unanimous decision sa women’s featherweight quarterfinals sa 2020 Tokyo Olympics boxing event kagahapon didto sa Kokugikan Arena sa Japan.

Ang duha ka judges parehong mitali og 30-27 samtang ang laing tulo dunay unipormeng iskor nga 29-28 alangsa 29-anyos nga si Petecio nga mitikang ngadto sa duha na lang ka daog aron paglangkat og laing bulawang medalya sa nasud.

Gawas nga gisilyohan ang ikaduhang medalya sa nasud human si Hidilyn Diaz midaog sa makasaysayanong gold sa weightlifting tulo ka adlaw pa ang milabay, giseguro sab ni Petecio nga ang Team Phl makabulsa og dili mominus duha ka medalya sa Olympics sa labing unang higayon sud sa 89 ka tuig.

Ang katapusang higayon nga ang Pilipinas nakabira og dili mominus duha ka medalya nahitabo niadtong 1932 Los Angeles Games diin kini misakmit og tulo ka bronze kortesiya nilang Simeon Toribio (men's high jump, athletics), Jose Villanueva (men's bantamweight, boxing), ug Teofilo Ildefonso (men's 200m backstroke, swimming).

Ang garbo sa Davao nga si Petecio makigsangka sunod ni Irma Testa diin siya seguradong maka-silver ug maka-angkon og luna sa finals kon ugaling iyang mabuntog ang Italyano niyang kontra.

Sa pagka karon, ang Team Phl 5-0 na sa boxing.

Ang mga Pinoy nanghinaut nga inaton ang mainit nilang ratsada sa dihang sila si Eumir Felix Marcial ug Irish Magno makigharong batok sa managlahing kontra karong adlawa.

Si Marcial makigtige ni Younes Nemouchi sa Algeria sa men's middleweight Round of 16 karong alas 10:48 sa buntag samtang si Magno naglaraw nga motaak sa quarterfinals sa iyang paghamag ni Jutamas Jitpong sa Thailand sa women's flyweight Round of 16 sa alas 12:24 sa hapon/.