Cebuana lifter Elreen Ando impresibo sa Olympics debut

CEBU, Philippines — Pakyas man tuod siya pagpugnit og medalya apan ang Sugbuanong lifter nga si Elreen Ann Ando way duda nga mihimo og impresyon sa iyang Olympics debut.

Ang 22-anyos nga si Ando mitapos ikapito sud sa 13 ka lig-on nga mga entrante sa women's 64kg category sa 2020 Tokyo Olympics weigthlifting event didto sa Tokyo International Forum niadtong Martes sa gabii.

Si Ando mialsa og 100kg sa snatch ug 122 sa clean and jerk alang sa 222kg nga total.  Apan dili kini igo aron pagpiog nilang Moude Charron (236kg) sa Canada, Giorgia Bordignon (232kg) sa Italy, ug Chen Wen-Huei sa Chinese Taipei (230kg) nga maoy mi-okupar sa nag-unang tilo ka puwesto.

Bisan pa man niini, dalaygon gihapon kaayo ang gipakitang salida ni Ando isip usa ka first-time Olympian ilabi na kay gibaid og maayo ang iyang abilidad alang unta sa 2024 Paris Olympics sa wala pa ang surprisa niyang kwalipikasyon sa Tokyo Games.

Gawas pa, ang kababayan niyang si Hidilyn Diaz nanginahanglan og tulo ka Olympics sa wala pa misakmit og medalya sa labing unang higayon nadtong 2016 didto sa Rio de Janiero, Brazil. Tulo pa ka adlaw ang milabay, si Diaz mikulit og kasayayan human midaog sa labing unang gold medal sa nasud sa Olympics.

Sa pangagpas ni Samahang Weightlifting ng Pilipinas (SWP) president Monico Puentevella, si Ando dili na maabtan og tulo ka Olympics aron makabulsa og medalya.

“Hinog na si Elreen sa 2024 Paris Olympics,” dason pa ni Puentevella. “She is our project for 2024, together with Vanessa Sarno. Magaling lang talaga kaya nasama na kaagad sa Tokyo.”