Fil-Am fencer tinuhog ang Olympic gold

MANILA, Philippines — Tinusok ni Filipino-American Lee Kiefer ng USA ang gold medal sa women’s individual foil event matapos talunin ang nagdedepensang si Inna Deriglazova ng Russia, 15-13, sa Tokyo Olympics fencing competition sa Makuhari Messe Hall.

Nakahulagpos ang 27-anyos na si Kiefer, ang inang si Teresa ay tubong Tagum City, Davao, mula sa 12-12 pagtatabla patungo sa pagkopo sa gintong medalya laban sa 31-anyos na si Deriglazova.

“To come out here and to feel good about your fencing is what all the athletes strive to do and hope you have a medal at the end, so I have everything,” sabi ni Kiefer.

Sa isang panayam ay binanggit ni Kiefer ang pagbisita niya sa Pilipinas nang siya ay 10-anyos pa lamang kasama ang kanyang ina at amang si Steve.

Ito ang ikatlong Olympic stint ng Fil-Am matapos noong 2016 Rio de Janeiro at 2012 London edition.

Ang Olympic gold ay idinagdag ni Kiefer sa makulay niyang fencing career na tinatampukan ng gintong medalya sa foil women’s team noong 2018 World Fen-cing Championships sa Wuxi, China.