50 taong tagtuyot tinapos ng Bucks
Giannis humataw sa pagsikwat ng NBA crown
MILWAUKEE - Hindi na hinayaan ni Giannis Antetokounmpo na makahirit ang Phoenix ng Game Seven.
Humakot si Antetokounmpo ng 50 points, 14 rebounds at 5 blocked shots para banderahan ang Bucks sa 105-98 paggupo sa Suns sa Game Six ng NBA Finals at angkinin ang kauna-unahan nilang korona matapos ang 50 taon.
Huling nagkampeon ang Bucks noong 1971 sa likod nina Oscar Robertson at Lew Alcindor (Kareem-Abdul Jabbar).
Itiniklop ng Milwaukee sa 4-2 ang kanilang best-of-seven championship series ng Phoenix matapos maiwanan sa 0-2.
“I’m happy I was able to do it with this team for Milwaukee,” wika ng two-time NBA MVP na si Antetokounmpo. “And Coach Bud (Mike Budenholzer) says we have to do it again.”
Nag-ambag si Khris Middleton ng 17 points para sa Bucks habang may 16 markers si Bobby Portis mula sa bench at tumipa si guard Jrue Holiday ng 12 points, 11 assists at 9 rebounds.
“These players are champions every day. They’ve embraced getting better every day,” ani Budenholzer.
Pinamunuan ni Chris Paul ang Suns sa kanyang 26 points at nagdagdag si Devin Booker ng 19 markers mula sa malamyang 8-for-22 fieldgoal shooting kasama ang 0-of-7 clip sa 3-point range.
“There’s just a pain that goes with your season being over,” ani Phoenix coach Monty Williams. “But I’ve never dealt with this and so I’m grateful, like I said, but I know this is going to hurt for a while.”
- Latest
