Galedo, Velasco umangat sa ITT event
MANILA, Philippines — Ipinakita ni veteran Mark John Lexer Galedo na hindi pa siya laos matapos bumandera sa Day One ng PhilCycling National Trials for Road noong Sabado sa Clark Freeport Zone sa Pampanga.
Humataw ang 35-anyos na si Galedo ng tiyempong 32 minuto at 2.2 segundo para pagharian ang men’s individual time trial (ITT) na ipinadyak sa distansyang 24.6 kilometro sa Clark Parade Grounds.
Tinalo ng pambato ng 7-Eleven Roadbike Philippines sina Navyman Jhon Mark Camingao (32:28.0) at Joey delos Reyes (33:00.3) na kumuha sa silver at bronze medal, ayon sa pagkakasunod.
Natalo naman ang 2013 Myanmar Southeast Asian Games gold medalist sa men’s criterium race na itinakbo sa 2-3-km perimeter ng Clark Parade Grounds.
Inangkin ni Dominic Perez ng Go For Gold ang panalo sa kanyang itinalang 13 points kasunod sina Navyman Steve Hora (10) at Go For Gold teammate Ronnel Hualda (10).
Samantala, si Kate Yasmin Velasco ng Philippine Navy-Standard Insurance ang nanguna sa 17.1km women’s ITT sa kanyang bilis na 27:52.814 sa national trials na inorganisa ng PhilCycling na pinamumunuan ni Philippine Olympic Committee (POC) president at Tagaytay City Rep. Abraham “Bambol” Tolentino.
Ang 19-anyos namang si Mathilda Krog ng Philippine Navy-Standard Insurance ang bumandera sa women’s criterium sa kanyang 23 points.
- Latest
