McMillan gihimong head coach sa Hawks

CEBU, Philippines — Dili na 'interim' apan usa na ka hingpit nga head coach sa Atlanta Hawks si Nate McMillan. Mao kini ang nahimo niyang ganti human gitimon ang Hawks ngadto sa NBA Eastern Conference Finals.

Si McMillan maoy midala sa Hawks human gipalagpot si head coach Lloyd Pierce niadtong Marso.

Nindot kaayo ang pagkupot ni McMillan sa Hawks diin sila miposte og 27-11 record apil na ang 10 ka daog sud sa 18 ka duwa sa playoffs.

Gipangtagak sa Hawks ang New York Knicks ug ang Philadelphia 76ers sa wala pa sila gibuntog sa Milwaukee Bucks sa East Finals.

Sa wala pa mitikang sa Hawks, si McMillan naka-coach sab sa Seattle, Portland, ug Indiana. Sa 17 ka tuig niyang pagsilbe isip head coach, mirehistro siya og 688-599 nga baraha.