Gilas PilIpinas maraming natutunan sa FIBA OQT

MANILA, Philippines — Walang naipanalo ang Gilas Pilipinas sa dalawang laro nito kontra sa Serbia at Dominican Republic sa FIBA Olympic Qualifying Tournament na ginaganap sa Belgrade, Serbia.

Ngunit uuwi ang bagitong Gilas squad bitbit ang malalim na karanasang natutunan nito na magagamit ng tropa para sa mga susunod na international tournaments.

Kabilang na rito ang FIBA Asia Cup na lalarga sa susunod na buwan sa Jakarta, Indonesia.

Pormal nang tumulak pabalik ng Pilipinas ang Gilas Pilipinas kahapon.

At darating ang tropa sa Ninoy Aquino International Airport na nakataas ang noo dahil sa matikas na ipinamalas nito sa Olympic qualifiers.

“We will now hit home with lessons in our pocket. We’ll take this on the chin, and we’ll try to learn our lessons and build for the future,” ani Gilas Pilipinas head coach Tab Baldwin.

Matatandaang pinahirapan ng Gilas Pilipinas ang world No. 5 Serbia bago isuko ang 76-83 kabiguan.

Nakipagsabayan din ang Pinoy cagers sa Dominican Republic subalit kinapos ito sa huli tungo sa 67-94 pagyuko.

“There are so many lessons. Both lessons on how to handle measured success, how to handle complacency, how to handle expectations, how to handle your opposition, various styles of play, how to adapt,” ani Baldwin.

Sa pagbabalik ng Gilas Pilipinas, muli itong tututok sa ensayo para paghandaan ang kampanya sa FIBA Asia Cup.

Pag-aaralan din ng coaching staff ang mga laro ng Gilas Pilipinas sa Olympic qualifiers upang maitama ang ilan sa mga pagkakamali nito.

“But we don’t have any other choice but to absorb it, analyze it, and look at ourselves,” ani Baldwin.