Apolinar, Vicelles andam na mokumbati

CEBU, Philippines — Sila si Pete “Thunder” Apolinar ug Mark “Rasta Man” Vicelles sa Omega Gym parehong naglantaw sa usa ka malisud nga gubat batok sa managlahing kontra sa gikahinaman nga "Kumbati 10" card sa Omega Sports Promotions karong Sabado, Hulyo 3, didto sa IPI Sports and Recreational Complex sa Barangay Tingub, dakbayan sa Mandaue City.

Si Apolinar (14-1, 8KOs) moasdang ngadto sa labing dako nga hagit sa iyang karera sa dihang iyang sangkaon si Jess Rhey Waminal (14-3-1, 8KOs) alang sa bakanting OPBF Silver featherweight belt.

Malisud man tuod nga tahas ang iyang sagubagon apan ang 26-anyos nga garbo sa San Pablo City, Laguna andam nga mo-atubang niini uban ang tumng kadasig.

"Sa pagiging handa po, wala po kaming araw na sinayang ni coach Junco," matud pa ni Apolinar. "Sa mga training days namin, from skills to mitts, in all aspects po ang training namin together with our conditioning coach Ernest (Ybanez). Di po kami nila pinababayaan lalo na po sa management nang Omega Sports Promotions. Solid po yung support na binibigay sa amin ni sir Paulo (Castillo) at VP Jerome Calatrava. 100 percent prepared na po ako."

"Gagawin ko lang po sa laban ay ipakita at ibigay ko po lahat ng pinaghirapan namin nga team sa loob nang mahigit 2 months na training namin. Ang maipapangako ko lang po ay isang magandang laban. The rest is pinauubaya ko na po kay Lord," dugang pa ni Apolinar.

Mao sab ang gipaambit ni WBC No.6 light flyweight contender Vicelles (13-0-1, 7KOs), nga makigbinukbukay ni Jerven Mama (12-0-1, 7KOs) sa Sanmam Gym sa angay lantawon nga engkuwentro tali sa duha ka way pildeng mga boksidor.

"Nangandam ko og maayo sa akoa kontra labi na gyud kay pareho mi undefeated," dason pa ni Vicelles. "Plano nako i-preassure si Mama kay maayo kaayo siya sa distance fight ug abtik pud siya. Paningkamotan nako nga madaog kay kani nga fight para sa akoa pamilya og sa akoa hometown Lebak, Sultan Kudarat. Dili ko makaingon na ma-knockout siya ky pareho man mi nag-training sad. Si Lord na bahala sa amoa fight. Panalangin ko lang po na maging safe kami sa laban."