Lue:Clippers posible pang makabangon

CEBU, Philippines — Si coach Tyronne Lue masaligon nga ang Los Angeles Clippers makabawi pa human malubong og 3-1 sa Phoenix Suns sa ilang best-of-seven NBA Western Conference final series.

May katungod ug katuhoan si Lue nga mopadayag niini kay siya mismo nakaagi na sa maong sitwasyon.

Sa dihang si Lue maoy coach sa Cleveland niatong 2016 season, ang Cavaliers na-alkansi og 3-1 batok sa Golden State Warriors sa ilang best-of-seven NBA Finals.

Apan nakahimo og usa ka dakong milagro ang Cavs sa dihang gisagunsonan og tulo ka pilde ang Warriors dayon na ngadto sa pag-angkon sa labing unang NBA title sa kasaysayan sa ilang prangkisa.

Mao kini ang sukaranan ni Lue nganong malaumon siya nga ang Clippers posibleng pang mopatikyaob sa nagkayong Suns.

Mabug-at hinoon nga misyon ang pas-anon sa Clippers ilabi na kay ang Suns mao may mo-host sa Game 5 karong adlawa.