Clippers Miresbak

CEBU, Philippines — Si Paul George mikadlit og 27 puntos uban ang 15 ka rebounds sa dihang gibaslan sa Los Angeles Clippers ang Phoenix Suns, 106-92, sa Game 3 sa ilang best-of-seven NBA Western Conference Finals kagahapon didto sa Staples Center sa Los Angeles, California.

Midugang si Reggie Jackson og 23 puntos samtang si Ivica Zubac miposte og 15 puntos ug 16 ka rebounds alang sa Clippers nga miputol sa labaw sa Suns ngadto na lang sa 2-1. Posible nilang tablahon ang serye sa Game 4 karong Dominggo didto gihapon sa ilang korte.

Krusyal kaayo ang daog sa Clippers gumikan kay wala pa may team sa kasaysayan sa NBA nga nakadaog sa usa ka best-of-seven series human mapilde sa nag-unang tulo ka duwa.

Si Deandre Ayton maoy mangu sa Suns uban ang 18 puntos samtang si Chris Paul mibahug og 15 puntos ug 12 ka assists apan gisugat og pilde sa iyang pagbalik og duwa human gi-kwarantin sud sa usa ka semana tungod sa Covid-19 protocols sa liga.

Ang alas sa Suns nga si Devin Booker nalimitahan ngadto lamang sa 15 puntos. Miduwa siya nga dunay protective mask gumikan kay nabuak ang ilong niadtong Game 2. Sa kinatibuk-an, mipasud lamang siya og lima sa 21 niya ka itsa.

Ang Suns naglabaw pa unta og dos puntos sa halftime, 48-46, apan ang Clippers milusad og nagbagang 21-3 rally sa ikatulong kuwarter aron pagrehistro og 71-56 nga labaw. Wala na makabawi pa sukad niadto ang Suns.

Ang Suns igo lamang nakasikit ngadto sa sayes puntos gumikan kay si Jackson mipasud sa malisud niyang layup ug dayon miposa og hagpok kaayong tres nga nakapaginhawa og lawom sa Clippers sa hilimatyong minutos nga nahibilin sa aksiyon.