CEBU, Philippines — Nagtabla ang Gilas Pilipinas ug ang gamhanang China, 79-79, sa ilang tuneup game niadtong Miyerkules sa gabii didto sa AUF Gym sa Angeles City, Pampanga.
Ang Gilas pakyas pagpukan sa China bisan og kontrolado nila ang duwa ug gank naglabaw pa og siyete puntos, 78-71, sa pinal nga usa ka minuto sa aksiyon.
Ang maong duwa nagsilbe nilang warm-up sa umaabot nilang FIBA Olympic Qualifying Tournament.
Ubos sa pagtimon ni coach Tab Baldwin, ang Gilas milarga na kagahapon padung sa Serbia aron mokumbati sa FIBA OQT didto sa Belgrade.
Malisud nga tahas ang nagpaabot sa Gilas sa unahan ilabi na kay una nilang sangkaon ang host Serbia karong Hulyo 1. Ilang makaharong ang lig-on sab nga Dominican Republic sunod adlaw.
Ang Sugbuanong si Carl Tamayo naglangkob sa Gilas Pilipinas kauban silang RJ Abarrientos, Geo Chiu, Kai Sotto, Justine Baltazar, SJ Belangel, Isaac Go, Jordan Heading, Ange Kouame, William Navarro, Mike Nieto, ug Dwight Ramos.