CEBU, Philippines — Ang Cordova Dutchess Dagami Warriors mikulit og laing duha ka sagunson nga daog aron angkonon ang solong liderato sa Southern Division sa 1st Professional Chess Association of the Philippines (PCAP) GM Wesey So Cup online tournament nga giduwa niadtong Miyerkules sa gabii pinaagi sa lichess platform.
Gipangulohan nilang Israeli Grandmaster Nitzan Steinberg, National Masters Merben Roque ug Mario Magubat, ug Woman International Master Bernadette Galas, ang Dagami Warriors ni PCAP vice chairman Ariel Potot milampaso sa Isabela Knight Raiders, 16-5, ug Cavite Spartans, 15-6, aron paglayat niini sa kinatas-ang bahin sa South standings bitbit ang 19-4 win-loss record.
Sukwahi sa Cordova, ang Toledo City Trojans nakatilaw sa ikaduha nilang duha ka sunod-sunod nga pilde sa torneyo.
Ang Trojans miyukbo sa Antipolo Cobras, 8.5-12.5, sa wala pa gilampornas sa San Juan Predators, 4.5-16.5, hinungdan nga natagak sila sa ikaunom nga puwesto uban ang 14-9 nga baraha.
Samtang ang Lapu-Lapu City Naki Warriors gilampaso sa Manila Indios Bravos, 3.5-17.5, apan mibihag sa Olongapo Rainbow Team 7, 13-8, hinungdan nga nagpabilin kini sa ikapitong dapit uban ang 8-15 nga marka.
Sa laing resulta, ang Cebu City Machers napilde og usa ka lugas sa Cavite, 10-11, sa wala pa gipakaging sa Cagayan Kings, 4-17, hinungdan nga nadakin-as kini ngadto sa 6-17.