CEBU, Philippines — Ang sentro sa Miami Heat nga si Bam Adebayo ug ang superstar guard sa Brooklyn Nets nga si James Harden mipasalig nga moapil sa 12-man Team USA nga mopakita'g aksiyon sa Tokyo Olympics sunod bulan.
Gawas nilang Adebayo ug Harden, kompirmado sab nga moduwa sa US team sila si Kevin Durant sa Nets, Draymond Green sa Golden State Warriors, Bradley Beal sa Washington Wizards, Jayson Tatum sa Boston Celtics, Devin Booker sa Phoenix Suns, ug Damian Lillard sa Portland Trail Blazers.
Sila si Paul George ug Kawhi Leonard sa LA Clippers ug Chris Paul sa Phoenix Suns naparamdam sab nga morepresenta sa ilang nasud sa prestihiyosong torneyo nga mahitabo kausa lamang sud sa upat ka tuig.
Si Paul sakop sa US team nga milangkat og gold medal sa 2008 Beijing ug 2012 London Olympics.
Duna sab hinooy bitoon nga namalibad sama nilang Stephen Curry sa Warriors ug Donovan Mitchell sa Utah Jazz.