CEBU, Philippines — Ang Phoenix Suns naglaraw nga moposte og 2-0 nga bentaha batok sa Los Angeles Clippers sa ikaduha nilang panag-abot sa ilang best-of-seven NBA Western Conference Finals karong adlawa didto sa korte sa Suns.
Magtige sila sugod sa alas-9 sa buntag.
Ubos sa pagpangu ni Devin Booker nga mipabuto og 40 puntos sa labing unang triple-double sa iyang karera , ang Suns maoy unang mipadanak og dugo sa serye human gipakasit ang Clippers,120-114, niadtong Lunes.
Gawas ni Booker, lain pang mga batos sa Suns nga gipangagpas maghatag og labad sa ulo sa Clippers mao sila si Deandre Ayton, Mikal Bridges, Jae Crowder ug Cameron Johnson. Gipamatud-an sa Suns nga bisan og wala ang usa nila ka superstar ga si Chris Paul kay dunay angol, hait ug mangtas gihapon sila nga koponan.
Misamot pa ka-inilog ang Suns gumikan kay ang alas sa Clippers nga si Kawhi Leonard dili pa gihapon kaduwa kay nayayay ang tuong tuhod. Gawas niini, bun-og na sab kaayo ang top defender sa Clippers nga si Marcus Morris.
Mao nang ang tsansa sa Clippers mag-agad sa mga kamot nilang Paul George, Patrick Beverly, Ivica Zubac, Reggie Jackson, Nicolas Batum ug Terance Mann.