Suns giunhan ang LA Clippers sa West
CEBU, Philippines — Si Kevin Huerter mikadlit og playoff career-high 27 puntos sa dihang ang Atlanta Hawks mi-abante sa NBA Eastern Conference finals sa labing unang higayon sud sa unom ka tuig human gitagak ang Philadelphia 76ers, 103-96, sa kulbahinam nilang Game 7 kagahapon.
Wala sab magpabitin si Trae Young nga mihipos og 21 puntos ug 10 ka assists, ug ingon ma sila si John Copllins ug Danilo Gallinari. Si Collins mipupo og 14 puntos ug 16 ka rebounds samtang si Gallinari miamot og 17 puntos alang sa Hakws nga tulo ka higayon midaog sa Philadelphia aron tuldokan ang serye sa baraha nga 4-3.
Sangkaon sunod sa Hawks ang Milwaukee Bucks. Ang Game 1 sa ilang best-of-seven East Finals duwaon karong Huybes didto sa homecourt sa Bucks.
Sa West Finals, si Devin Booker mipabuto og 40 puntos sa iyang triple-double sa dihang giunhan sa Phoenix Suns ang LA Clippers, 120-114. Si Booker milangkat sab og 13 ka rebounds ug 11 ka assists sa labing unang triple-double sa iyang karera.
Si Deandre Ayton mitampo og 20 puntos samtang sila si Mikal Bridges, Jae Crowder ug Cameron Johnson nagkumbinar og 39 puntos alang sa Suns nga padayong nagkayo.