CEBU, Philippines — Ang labing unang event sa ARQ Boxing Promotions nga nahulma sud sa upat ka bulan nagmalampuson niadtong weekend.
Human nauswag pipila ka higayon sukad sa inisyal niining iskedyul niadtong Marso, ang buena manong dalit sa ARQ sa Cebu boxing nga giulohan og "Engkwentro Uno" nadayon na gyud niadtong Sabado, Hunyo 19, didto sa Cosonsa Manufacturing Compound sa Ibabao, Mandaue City.
"Fulfilled ug happy kaayo mi nga successful ang labing una namong promosyon," matud pa ni ARQ Sports Director Chelito "Coach Carz" Caro. "Mapasalamaton kaayo mi sa among promoter nga si mam Eva Mari Arquisola ug sa iyang bana nga si boss Jason Arquisola sa todo nilang suporta sa amoang boxers."
"Mag-expect gyud ta nga duna pay daghang 'Engkwentro' sa umaabot ilabi kay ato nang nakita ang potensiyal sa atoang mga boxers. Mao kini ang angayan atngan sa mga boxing fans dinhi sa Cebu," dugang pa ni Caro. "Ato gyud ni sila nga i-build up aron mosaka ila ratings ug maka-produce ta og regional ug world champion sa umaabot kay mao gyud ni ato target."
Ang lima sa pito ka mga boksidor sa ARQ milugwa nga madaogon. Ang labing impresibo mao ang way pildeng flyweight contender nga si April Jay "Astroboy" Abne ug John Paul Gabunillas.
Ang 22-anyos nga si Abne mipukan ni Royder Lloyd Borbon pinaagi sa TKO sa nahibiling 36 segundos sa ikatulong hugna aron inaton ang perpekto niyang record ngadto sa 6-0 uban ang 3KOs, samtang si Gabunillas nakalingkawas human matumba sa unang hugna dayon na ngadto sa pagpa-surender ni Maurino Agum sa Big Yellow Stable sa ikaupat nga hugna.
Milampos sab ang manghud ni Abne nga si Ian Abne, ug ingon man sila si Yeroge Gura, ug Rodex Piala also emerged victorious.
Si April Abne mipatikangkang ni Marvin Campos sa unang hugna, si Gura mipatigbabaw batok ni Steven Noblefranca pinaagi sa unanimous decision, samtang si Piala nakaipsot batok ni Vicente Casido pinaagi sa majority decision.
Dili hinoon tanan pagmaya ang natagamtaman sa Team ARQ gumikan kay si Zandro "Little Pacman" Librador nahisukamod sa iyang pro debut batok ni Reycar Auxilio sa Big Yellow Stable, samtang si Arniel Cañete miyukbo ngadtong Christopher Caburog.