CEBU, Philippines — Sa labing unang higayon sa kasaysayan sa Philippine boxing, duha ka Pinoy'ng kampiyon ang mag-abot ibabaw sa ring.
Kini gumikan kay si WBC batamweight champion Nonito "The Filipino Flash" Donaire ug ang kababayan niining si John Riel "Cuadro Alas" Casimero, ang WBO champion, magbangga sa seguradong usa ka eksplosibong unification bout karong Agosto 14 didto sa Dignity Health Sports Park sa Carson City, California.
Si Casimero orihinal untang gikatakda nga makigtige ni WBA champion Guillermo Rigondeaux sa Cuba apan sa kalit lang si Rigondeaux gibunlot sa mga promoters sa maong card dayong paslak ni Donaire aron maoy makontra ni Casimero.
Tataw nga atngan sa mga fans ang maong engkuwentro ilabi kay ang modaog maka-angkon og katungod nga makigharong ni IBF, WBA Super ug The Ring bantamweight champion Naoya "Monster" Inoue sa Japan aron pag-ila kon kinsa maoy tinuod nga hari sa ilang dibisyon.