CEBU, Philippines — Ang Roxas Vanguards nagpanikad nang mowadwad sa ilang abilidad sa Mindanao leg sa labing unang Pilipinas VisMin Super Cup nga sugdan sunod bulan sud sa bubble didto sa Pagadian City, Zamboanga del Sur.
Usa ang Vanguards ni mayor Jan Hendrik I. Vallecer sa siyam ka Mindanao teams nga miporma og lig-on nga koponan aron pahayagan ang tagsa-tagsa nila ka mga kampanya sa kampiyonato.
Ubos sa pagtimon ni coach Eddie Laure, ang Vanguards makigtige batok sa Basilan Peace Riders, JPC Zamboanga City, Clarin Sto. Nino, Kapatagan Buffalo Braves, Alza Alayon Zamboanga, Iligan Archangels, Pagadian Explorers, ug Misamis Oriental-Brew Authoritea.
Mo-abag ni Laure pagpadagan sa Vanguards mao ang Sugbuanon niyang assistant coach nga si Edsel Vallena, nga ning puntoha wala pa mipadayag kon unsay ilang tsansa nga manghawod sa liga.
"Dili namo masulti kung unsa'y among tsansa tungod kay ang mga koponan sa Mindanao kusgan kaayo," dason pa ni Vallena. "Apan among isaad nga hatagan namo sila og maayong dula ug nga dili mi nila mapilde sa sayon nga pamaagi. Kanunay mi magkugi ug ihatag ang tanan hangtud sa katapusang segundo matag duwa. ”
Gipasalig sad ni Vallena ang hingpit niyang suporta sa pamaagi ug sistema ni coach Laure.
"Isip assistant coach, akoang ipaambit sa team ang mga nakat-onan nako sa Cebu labi na sa depensa ug pagsigpat sa kahuyang sa among mga kaatbang. Labaw sa tanan, akong panghinaut nga unta makab-ot namo ang among misyon ning ligaha," batbat pa ni Vallena.