Kasaysayan sa ARQ Boxing

Labing unang promosyon kumbatihan na karong adlawa

CEBU, Philippines — Ang ARQ Boxing Promotions moabli og panid kasaysayan gumikan kay ipahigayon na niini ang labing una nilang promosyon nga giulohan og "Engkwentro Uno" karong adlawa ubos sa istriktong patakaran sa panglawas  didto sa Gate 2 sa Cosonsa Manufacturing Compound sa Barangay Ibabao, dakbayan sa Mandaue.

"Mao na gyud ni! Naabot na gyud ang dugay na namong gipaabot. Andam na kaayo mokumbati amoang mga boxers ug pamatud-an ang ilang katakos," dason pa ni ARQ Sports Director Chelito "Coach Carz" Caro.

Ang managtiayong Jason ug Eva Mari Arquisola mitukod sa ARQ Boxing sayo ning tuiga aron paghatag og paglaum ug ingon man oportunidad sa mga pobre apan talentadong boksidor ning panahon sa pandemiya.

Ang tanang walo ka mga pambato sa ARQ Stable nga gipangulohan ni flyweight contender April Jay "Astroboy" Abne (5-0, 2KOs) mopakita'g aksiyon ning walo ka sangka nga pasundayag nga gibahin sa duha ka parte.

Si Abne makigbinukbukay sa kanhi boksidor sa Omega Gym nga si Royder Lloyd Borbon sa main event sa buntag nga engkuwentro nga magsugod sa alas-11.

Ang igsoon ni Abne nga si Ian Abne ingon man sila si Berland Robles, ug Zandro "Little Pacman" Librador mosalida sab.

Si Ian Abne moasdang batok ni Marvin Campo sa RWS Stable; si Robles makigtige ni Kevin Smith Nemenzo sa Lapu-Lapu City; samtang si Librador makigharong ni Rexcar Auxillo sa Big Yellow Stable.

Si John Paul Gabunillas mao na say mo-arangkada sa hapon nga aksiyon nga mosikad sa alas-2. Duyogan siya sa iyang mga katropa nga sila si Yerrodge Gura, Arniel Canete, ug Rodex Piala.

Makigpinaksitay si Gabunillas ni Maurino Agum sa Big Yellow Stable;si Gura mohamag ni Steven Noblefranca sa Talisay City; si Canete makigsinukliay og kumo ni Christopher Caburog sa Big Yellow Stable; samtang si Piala makigbugno ni Vicente Casado sa Cebu City. —Emmanuel B. VillaruelBucks mipuwersa'g Game 7

Sila si Khris Middleton ug Giannis Antetokounmpo nagkumbinar og 68 puntos sa dihang gibaslan sa Milwaukee Bucks ang Brooklyn Nets, 104-89, sa Game 6 sa ilang NBA playoff series.

Si Middleton mikadlit og playoff career-high 38 puntos uban ang 10 ka rebounds ug lima ka assists samtang si Antetokounmpo mi-iskor og 30 ug milangkat og 17 ka rebounds alang sa Bucks, nga mitabla sa best-of-seven Eastern Conference semifinals sa baraha nga 3-3.

Ang tinagakay nga Game 7 gikatakda karong Dominggo didto sa Barclays Center, ang homecourt sa Nets diin nila gilansang ang ilang tulo ka daog sa serye.

Hait kaayo si Middleton nga mipasud og 11 sa 16 niya ka itsa apil na niini ang lima ka tres. Kausa ra sab siya masipyat sa 12 niya ka free throws.

Kontrolado kaayo sa Bucks ang duwa gikan sa pagsugod. Igo lamang nakasikit ang Nets ngadto sa singko puntos, 77-82,  gumikan kay ang Bucks milusad og nagkayong 18-2 rally aron paglubong sa  ilang karibal og 15 puntos.

Dako sab og naambag si Jrue Holiday nga mikolekta og 21 puntos sa Bucks.

Si Kevin Durant mihipos og 32 puntos ug 11 ka rebounds samtang si James Harden mitunol og 16 puntos apan parehong nangahoyhoy ang ilang abaga gumikan kay nahagba ang Nets ning higayona.