Suns nanoktok sa West Finals

CEBU, Philippines — Si Devin Booker mi-iskor og 28 samtang si Chris Paul midugang og 27 puntos ug walo ka assists sa dihang gimakmak na sab sa Phoenix Suns ang nagkagidlay nga Denver Nuggets, 116-102, aron pagposte og 3-0 nga bentaha sa ilang best-of-seven NBA Western Conference semifinal series kagahapon.

Misalida sab si Deandre Ayton uban ang 10 puntos ug 15 ka rebounds ug ingon man sila si Jae Crowder ug Mikal Bridges nga nagkumboya og 25 puntos alang sa Suns nga puydeng i-sweep ang Nuggets karong Lunes didto gihapon sa korte sa Denver.

Ang Suns naglaraw nga makatikang sa West Finals sa labing unang higayon sukad niadtong 2009-10 season.

Si Nikola Jokic, nga nakadawat sa iyang MVP award sa wala pa ang duwa, mirehistro og triple double uban ang 32 puntos, 20 ka rebounds ug 10 ka assists apan naminghoy gihapon siya gumikan kay ang Nuggets nahagba sa ikatulong sagunson nga higayon.

Kini bisan pa man ang Nuggets nakapasol og tinigum nga 50 puntos gikan nilang Monte Morris, Michael Porter, ug Will Barton.

Sa laing aksiyon, si Joel Embiid mikimada og 27 puntos, siyam ka rebounds ug walo ka assists sa dihang gibalian na sab sa Philadelphia 76ers pako ang Atlanta Hawks, 127-111, aron pag-angkon og 2-1 nga labaw sa ilang Eastern Conference semis.

Si Embiid nakakuha og igong suporta gikan nilang Tobias Harris ug Ben Simmons nga nagkumbinar og 40 puntos.

Gawas sa nindot nga dagan sa ilang opensa, nakontrola sab sa Sixers ang sumusulbong nga bitoon sa Hawks nga si Trae Young nga mitapos lamang og 28 puntos sud sa 37 minutos. Si John Collins mipuntos og 23 samtang si Clint Capela dunay otso puntos ug 16 ka rebounds sa pilderong kawsa.