Utah Jazz 2-0 na; Bucks miresbak

CEBU, Philippines — Si Donovan Mitchell mipatuasik og 37 puntos sa dihang giyapaka na sab sa Utah Jazz ang LA Clippers, 117-111, aron pagkulit og 2-0 nga bentaha sa ilang best-of-seven NBA Western Conference semifinal series kagahapon didto sa Vivint Arena sa Salk Lake City, Utah.

Gikumpleto ni Mitchell ang iyang pagkamabayanihon pinaagi sa pagpasud sa krusyal niyang layup sa nahibilin nga 43 puntos apan daw sa nayayay gamay ang iyang paa human gi-foul ni Paul George sa pinak nga 10 segundos sa aksiyon. Nagtakiang siya padung sa foul line ug dayon milansang og usa sa duha niya ka free throws.

Si Fil-Am Jordan Clarkson miwadwad sab og maayo uban ang 24 puntos apil na ang unom ka tres. Wala sab magpabitin si Joe Ingles nga mikadlit og 19 puntos ug ingon man si Rudy Gobert nga midonar og 13 puntos ug 20 ka rebounds.

Sila si Reggie Jackson ug George maoy nangu sa Clippers human nagkumbinar og 56 puntos. Si Kawhi Leonard mi-iskor og 21 apan dos puntos lamang ang nahimo sa katapusang kuwarter.

Didto sa Milwaukee, ang Bucks mibawos og labtik sa Brooklyn Nets, 86-83, sa Game 3 sa ilang East semis series.

Si Khris Middleton mipabuhagay og 35 puntos samtang si Giannis Antetokounmpo miratsada og 33 puntos alang sa Bucks nga alkansi pa gihapon sa serye, 1-2, apan maayo nalang kay wala sila malubong ngadto sa 0-3 nga bangag.

Nangu sa pilderong Nets mao si Kevin Durant uban ang 30 puntos ug 11 ka rebounds.