Jazz umeskapo sa Clippers sa Game 1

SALT LAKE CITY — Umiskor si guard Donovan Mitchell ng 32 sa kanyang 45 points sa second half sa 112-109 pagtakas ng Utah Jazz sa Los Angeles Clippers sa Game 1 ng kanilang Western Confe­rence semifinals showdown.

Bumangon ang Jazz mula sa double-digit deficit para angkinin ang 1-0 bentahe sa kanilang best-of-seven series ng Clippers.

Tumipa sina Most Improved Player at Fil-Am guard Jordan Clarkson at Bojan Bogdanovic ng tig-18 markers para sa Utah.

Binanderahan ni Kawhi Leonard ang Los Angeles sa kanyang 23 points habang naglista si Paul George ng 20 points at 11 rebounds at may 18 mar­kers si Luke Kennard na kumonekta ng team-high na apat na triples.

Buhat sa 14-point deficit ay itinala ng Jazz ang 10-point lead, 103-93, sa 5:22 minuto ng fourth quarter hanggang makadikit ang Clippers sa 109-112 sa huling minuto.

Ang supalpal ni Utah center Rudy Gobert sa panabla sanang triple ni Los Angeles forward Marcus Morris ang sumelyo sa kanilang panalo.

Sa Philadelphia, itinabla ng 76ers sa 1-1 ang kanilang Eastern Conference semis wars ng Atlanta Hawks matapos umiskor ng 118-102 panalo sa Game Two.

Humakot si Joel Embiid ng playoff-best 40 points at 13 rebounds para banderahan ang Philadelphia.

Umiskor si Tobias Harris ng 22 markers at may 21 at 14 points sina Seth Curry at Shake Milton, ayon sa pagkakasunod, para sa pagtabla ng 76ers sa Hawks.