ARQ boxers nagpanikad mokumbati

CEBU, Philippines — Naghinam-hinam na ang walo ka mga boksidor sa ARQ Stable nga mo-away ug mohimo og impresyon sa labing unang pasundayag sa ARQ Promotions nga giulohan og "Engkuwentro Uno" karong Hunyo 19 didto sa Gate 2 sa Cosonsa Manufacturing Compound sa Barangay Ibabao, dakbayan sa Mandaue.

"Human pila ka higayon na-postpone, makapahigayon na gyud mi sa labing una namong promosyon," matud pa ni ARQ Sports Director coach Chelito Carol atol sa usa ka press conference kagahapon didto sa Vienna Kaffehaus sa Bonifacio District, Barangay Kasambagan, dakbayan sa Sugbu.

Ang managtiayong Jason ug Eva Mari Arquisola mitukod sa ARQ Boxing Promotions sayo ning tuiga sa tinguha nga kahatagan og paglaum ug kapanginabuhian ang mga boksidor taliwala ning pandemiya.

Ang way pildeng flyweight contender nga si April Jay "Astroboy" Abne (5-0, 2KOs), lumad gikan sa Manticao, Misamis Oriental, makigbinukbukay ni Royder Lloyd Borbon sa main event.

"Dili basta-basta maka-promote rong panahona kay pandemiya pero gitagaan gyud mi sa among manager og chance nga maka-away mao nang maningkamot gyud mi nga nindot ang ikapakita namong abilidad ug labaw sa tanan modaog kay mao ra kini ikabawos namo nila," matud pa ni Abne.

Ang igsoon niyang si Ian Abne ug uban pang stablemates nga sila si Berland Robles, Zandro Librador, John Paul Gabunillas, Yerrodge Gura, Arniel Canete, ug Rodex Pala mopakita sab og aksiyon ning pasiunang dalit sa ARQ sa Cebu boxing.

Si Robles mohamag ni Kevin Smith Nemenzo sa Lapu-Lapu City; si Ian Abne makigtige ni Marvin Campo sa RWS Stable; samtang si Librador makigsinukmagay ni Rexcar Auxillo sa Big Yellow Stable.

Mowadwad sab sila si Gabunillas vs Maurino Agum saBig Yellow Stable;Gura vs Steven Noblefranca sa Talisay City; Canete vs Christopher Caburog sa Big Yellow Stable;ug Pala vs Vicente Casado sa Cebu City City.

Gipaambit ni ARQ Stable chief trainer Eldo Apawan Cortes nga ang 22-anyos nga si Librador gikan sa Barangay Inayawan, dakbayan sa Sugbu usa sa ilang mga boksidor nga angayan atngan ug lantawon.

"Abtik ug paspas kaayo molabay og kumo kana si Zandro (Librador). Mura gyud og Manny Pacquiao ang style sa iyang inawayan mao nang amo na siyang gitawag nga 'Little Pacman'," dason pa ni Cortes.

Gipadayag sab ni Cortes nga siyento porsiyento nang mokumbati ang iyang mga batos gumikan kay hugtanon man ang ilang training sa miaging duha ka bulan.

"Ila gyud ning gipangandaman og maayo nga promosyon. Andam na kaayo ni sila tanan nga mokumbati. Matira ang matibay gyud ni," kanayon pa ni Cortes. "Kining ila mga kontra, wala ni nako gipili. Kadtong kursunada moaway maoy akong gikuha kay gusto nako nga masukod ang abilidad sa akoang mga boxers. Kon dili nila kaya kining ilang mga kontra, unsaon na lang nila pagsaka sa taas. Mas maayo nang ato mahibaw-an karon pa lang daan."