Kiefer ‘di pinayagan ng PBA

MANILA, Philippines — Hindi masisilayan si Kiefer Ravena suot ang Shiga Lakestars sa Japan B.League.

Ito ay matapos magdesisyon ang PBA Board of Governors na huwag pahintulutan si Ravena na makapaglaro sa Japanese league.

Nais ng PBA na sundin ni Ravena ang nakasaad sa kontrata nito sa NLEX Road Warriors.

“The PBA board had decided that Kiefer has to honor his contract with NLEX and with the PBA,” ani PBA chairman Ricky Vargas sa isang virtual press conference kahapon.

Humingi naman ng patawad si PBA commissioner Willie Marcial sa mga fans partikular na sa supporters ni Ravena.

Kailangan ni Ravena na irespeto ang pinirmahan nitong kontrata sa Road Warriors bago pumasok sa anumang uri ng kontrata sa labas ng PBA.

“We have a contract to abide by. We apologize,” ani Marcial.

Nakatakdang sumulat ang PBA sa Japan B.League upang iparating ang desisyon nito tungkol sa isyu ni Ravena.

Ipaaabot din ng liga ang desisyon nito sa Samahang Basketbol ng Pilipinas (SBP) na siyang nakikipag-usap sa FIBA sa mga usapin sa international player transfers.

Magugunitang inihayag ng Lakestars noong Miyerkules na nakuha nito ang dating Ateneo standout para lumaro sa 2021-2022 season ng Japan B.League.

Ngunit kasalukuyang nakapirma ng three-year maximum deal si Ravena sa NLEX Road Warriors.