Obiena lumundag ng gold sa Gothenburg Grand Prix

MANILA, Philippines — Patuloy ang pagpapalakas ni national pole vaulter Ernest John Obiena bilang preparasyon sa 2021 Olympic Games sa Tokyo, Japan sa susunod na buwan.

Lumundag si Obiena ng 5.70 metro para angkinin ang gold medal sa Gothenburg Athletics Grand Prix sa Sweden.

Inungusan ng 2019 Southeast Asian Games gold medalist para sa gintong medalya sina 2016 Rio de Janeiro Olympics gold medal winner Thiago Braz (5.65m) ng Brazil at Pal Haugen Lillefosse (5.60m) ng Norway na nakuntento sa pilak at tanso, ayon sa pagkakasunod.

Sinubukan ng 25-anyos na Pinoy bet na lundagin ang mas mataas na 5.80m, ngunit hindi niya ito nagawa sa tatlong attempts.

Ito ang unang pagsabak ni Obiena sa aksyon matapos maghari sa PSD Bank Indoor Meeting sa Dortmund, Germany at sa ISTAF Indoor Meet sa Berlin noong Pebrero.

Nauna nang nagposte si Obiena ng personal-best na 5.86m sa Orlen Cup sa Lodz, Poland sa nasabi ring buwan.

Kasalukuyang nasa No. 11 si Obiena sa world pole vault rankings.

Sasabak din sa 2021 Tokyo Olympics sina 2016 Rio de Janeiro silver medalist at weightlifter Hidilyn Diaz, gymnast Caloy Yulo, rower Cris Nievarez, taekwondo jin Kurt Barbosa at boxers Eumir Felix Marcial, Irish Magno, Nesthy Petecio at Carlo Paalam.